భద్రాద్రి కొత్తగూడెం / ఖమ్మం,
06-03-2026
రాష్ట్ర ప్రభుత్వం చేపట్టిన ప్రజా పాలన – ప్రగతి ప్రణాళిక 99 రోజుల ప్రత్యేక కార్యాచరణను అధికారులు, ప్రజాప్రతినిధులు సమన్వయంతో విజయవంతం చేయాలని రాష్ట్ర మంత్రులు వాకిటి శ్రీహరి మరియు పొంగులేటి శ్రీనివాస రెడ్డి పేర్కొన్నారు.
ఖమ్మం జిల్లా కలెక్టరేట్లో నిర్వహించిన ఉమ్మడి ఖమ్మం జిల్లా సన్నాహక సమావేశంలో మంత్రి వాకిటి శ్రీహరి అధ్యక్షతన ఈ కార్యక్రమంపై సమీక్ష జరిగింది. సమావేశంలో భద్రాద్రి కొత్తగూడెం జిల్లా కలెక్టర్ అంకిత్, ఖమ్మం జిల్లా కలెక్టర్ అనుదీప్ దురిశెట్టి, ఎమ్మెల్సీ తాతా మధు, ఎమ్మెల్యేలు కూనంనేని సాంబశివరావు, జారే ఆది నారాయణ, మాలోతు రాందాస్ నాయక్, తెల్గం వెంకట్రావు, కోరం కనకయ్య తదితరులు పాల్గొన్నారు.
మంత్రి వాకిటి శ్రీహరి వ్యాఖ్యలు
మంత్రి వాకిటి శ్రీహరి మాట్లాడుతూ, గ్రామ స్థాయి నుంచి జిల్లా స్థాయి వరకు 99 రోజుల కార్యాచరణను సమగ్ర ప్రణాళికతో అమలు చేయాలని అధికారులకు సూచించారు. పేదల సంక్షేమం, గ్రామాభివృద్ధి, వ్యవసాయ అభివృద్ధి వంటి అంశాలకు ప్రభుత్వం ప్రాధాన్యత ఇస్తోందన్నారు.
రైతులకు పండించే పంటలకు బోనస్ ఇవ్వడంతో పాటు రేషన్ ద్వారా నాణ్యమైన సన్నబియ్యం సరఫరా చేస్తున్నామని తెలిపారు. యువతలో క్రీడలపై ఆసక్తి పెంచేందుకు క్రీడా మౌలిక వసతులను అభివృద్ధి చేస్తున్నట్లు చెప్పారు.
పాఠశాలల్లో మధ్యాహ్న భోజన పథకంలో చికెన్ స్థానంలో చేపలు అందించే చర్యలు తీసుకుంటున్నామని తెలిపారు. గ్రామాల్లో కోతులు, వీధి కుక్కల సమస్య తగ్గించేందుకు ప్రత్యేక చర్యలు చేపడతామని పేర్కొన్నారు.
మంత్రి పొంగులేటి శ్రీనివాస రెడ్డి వ్యాఖ్యలు
మంత్రి పొంగులేటి శ్రీనివాస రెడ్డి మాట్లాడుతూ, సంక్షేమ మరియు అభివృద్ధి కార్యక్రమాలపై ప్రజలకు అవగాహన కల్పించడానికి ప్రభుత్వం 99 రోజుల కార్యాచరణ కార్యక్రమాన్ని ప్రారంభించిందన్నారు.
మార్చి చివరి నాటికి మొదటి విడత ఇందిరమ్మ ఇండ్ల గ్రౌండింగ్ పూర్తి చేయాలని అధికారులను ఆదేశించారు. ఆసక్తి లేని లబ్ధిదారుల స్థానంలో అర్హులైన వారికి ఇండ్లు కేటాయించాలని సూచించారు.
ఎస్సీ, ఎస్టీ, బీసీ, మైనారిటీ హాస్టళ్లకు ఇన్చార్జ్ అధికారులను నియమించి వారానికి ఒకసారి భోజన నాణ్యతను పరిశీలించాలని తెలిపారు. అలాగే డ్రైనేజీ సమస్యలు, రెవెన్యూ–అటవీ శాఖల భూ సమస్యలను జాయింట్ సర్వే ద్వారా పరిష్కరించాలని ఆదేశించారు.
వ్యవసాయ రంగంలో పంట మార్పిడి, రసాయనాల వినియోగం తగ్గింపు, ఆధునిక సాగు పద్ధతులపై రైతులకు అవగాహన కల్పించాలని మంత్రి సూచించారు.
కలెక్టర్ అంకిత్ వ్యాఖ్యలు
భద్రాద్రి కొత్తగూడెం జిల్లా కలెక్టర్ అంకిత్ మాట్లాడుతూ, 99 రోజుల కార్యాచరణను జిల్లాలో సమర్థవంతంగా అమలు చేసేందుకు అన్ని శాఖల సమన్వయంతో కార్యాచరణ ప్రణాళిక రూపొందిస్తున్నామని తెలిపారు.
పారిశుద్ధ్యం, వ్యవసాయం, ఆరోగ్యం, విద్య, యువజన క్రీడలు, మహిళా సంక్షేమం, పర్యావరణ పరిరక్షణ వంటి అంశాలపై ప్రత్యేక కార్యక్రమాలు చేపట్టి ప్రజల భాగస్వామ్యంతో ఈ కార్యక్రమాన్ని విజయవంతం చేస్తామని తెలిపారు.
ప్రజాప్రతినిధుల సూచనలు
ఎమ్మెల్సీ తాతా మధు గ్రామాల్లో కోతుల సమస్య పరిష్కారం, ఫుడ్ సేఫ్టీపై అవగాహన, ఆధునిక సాగు పద్ధతులపై చర్చలు నిర్వహించాలని సూచించారు.
కొత్తగూడెం ఎమ్మెల్యే కూనంనేని సాంబశివరావు ఇందిరమ్మ ఇండ్ల కేటాయింపులో అర్హులకు ప్రాధాన్యత ఇవ్వాలని, పాఠశాలల్లో క్రీడలకు ప్రాధాన్యం ఇవ్వాలని సూచించారు.
అశ్వారావుపేట ఎమ్మెల్యే జారే ఆది నారాయణ అధికారులు, ప్రజాప్రతినిధులు సమన్వయంతో పనిచేస్తే మెరుగైన ఫలితాలు వస్తాయని పేర్కొన్నారు.
సమావేశంలో ఖమ్మం మున్సిపల్ కార్పొరేషన్ కమిషనర్ అభిషేక్ అగస్త్య, భద్రాచలం ఐటిడిఏ పీవో బి. రాహుల్, భద్రాచలం సబ్ కలెక్టర్ మృణాల్ శ్రేష్ఠ, డీఎఫ్ఓ సిద్ధార్థ్ విక్రమ్ సింగ్, జెడ్పీ సీఈఓ దీక్షా రైనా మరియు ఇతర అధికారులు పాల్గొన్నారు.
- పాల్వంచలో భక్తి వైభవంగా శ్రీనివాస కళ్యాణ మహోత్సవం – పాల్గొన్న మంత్రులు పొంగులేటి, తుమ్మల
- పాల్వంచలో నవ మహిళా సాధికార కేంద్రంలో యోగ్యత పత్రాలు, చెక్కుల పంపిణీ
- శ్రీరామనవమి ఏర్పాట్లకు సి ఎస్ ఆర్ సంస్థల సహకారం అవసరం: కలెక్టర్ అంకిత్
- పదవ తరగతి పరీక్ష కేంద్రాలను ఆకస్మికంగా తనిఖీ చేసిన కలెక్టర్ అంకిత్
- జిల్లాలో ఎల్పీజీ గ్యాస్ కొరత లేదు – వదంతులను నమ్మవద్దు: కలెక్టర్ అంకిత్
